ඕනෑ කර තිබේ!

Wednesday, May 20, 2009
නිදහස් චින්තනය. අද ඉන්න යාන්ත්‍රික මිනිස්සුන්ට නැතිම දෙයක් තමයි මේ. යාන්ත්‍රික විතරක් නෙවෙයි, යාන්ත්‍රික නොවන අය තුලත් මේක හොයාගන්න ටිකක් අමාරුයි. මම මේ නිදහස් චින්තනය කියල කිව්වෙ නිදහස් රටක, නිදහස් මිනිහෙක් විදියට තමන්ට ඕන දේවල් තමන්ට ඕන විදියට හිතන එක ගැන නෙවෙයි. ඒකත් නිදහස් චින්තනයක් තමයි, හැබැයි මම කතා කරන්නෙ ඊට ටිකක් වෙනස් දෙයක් ගැන. මම මේ කියන්නෙ අපි හිතන දේවල් යම්කිසි විෂය රාමුවකට කොටු කරල හිතන්නෙ නැතිව වඩාත් පෘථුල විදියට, වඩාත් විශ්වීය විදියට හැකිතරම් සීමා රහිතව හිතන එක ගැනයි. බහුතරයක් මිනිසුන්ගේ තිබෙන ප්‍රධාන අඩුපාඩුවක් තමයි ඉතා ඉක්මනින්ම අර්ථ දැක්වීම් (සම්මතයන්) වලට කොටුවීම. (එනම් අර්ථ දැක්වීම් විශ්වාස කිරීම) අර්ථ දැක්වීම් වලින් වටවුනු මනසක නිර්මාණය වන දැනුම එම අර්ථ දැක්වීම් වල සීමා වලින් කොටුවේ. උදාහරණයක් විධියට අයින්ස්ටයින් තමන්ගේ චින්තනය නිව්ටන්ගේ රාමුවල කොටුකරගෙන තිබුනා නම් ඔහු කිසිදිනෙක සාපේක්ෂතාවදයක් නිර්මාණය නොකරනු ඇත.
වඩාත් සරල විදියට කියනවනම් අපි සාමාන්‍යයෙන් කියන්නෙ සාම්ප්‍රදායික භෞතික විද්‍යාවට අනුව මෙහෙමයි, ක්වොන්ටම් යාන්ත්‍රණයට අනුව එහෙමයි, බටහිර වෛද්‍ය විද්‍යාවට අනුව මෙහෙමයි, මාක්ස්වාදයට අනුව මෙහෙමයි, පෙරදිග සංගීතයට අනුව එහෙමයි, ආර්ථික විද්‍යාවට අනුව මෙහෙමයි කියලනෙ. ඒ නමුත් අපි එහෙම කියනකොට අපි දන්නෙම නැතුව අපේ චින්තනය ඒ ඒ රාමු වලට කොටු වෙනවා. එතකොට එතන නිදහස් චින්තනයක් නෑ. සරලව කියනවනම් එතකොට වෙන්නෙ නිදහස් චින්තනයක් තිබුන මිනිස්සුන්ගෙ මනසෙන් නිර්මාණය කරපු දැනුම පද්ධතියක අපේ සිතුවිලි හිර වෙන එකයි. හැබැයි එක දෙයක් මතක තියා ගන්න, අපි ඉන්න මේ ලෝකය මේ තත්වෙට ගෙනල්ල තියෙන්නෙ ඒ නිදහස් චින්තනය තිබිච්ච මිනිස්සු. ඒ වගේමයි මං අර කලින් උදාහරණෙදි කියපු ඔක්කොම සිද්ධාන්ත නිර්මාණය උනෙත් නිදහස් චින්තකයන් තුලයි. මොකද ඒ අය අනෙක් අය නොදැකපු දෙයක් මේ විශ්වයේ දැක්කා. ඒ අය රාමුවෙන් එපිටට හිතපු හින්දයි ඒ අය අලුත් දැනුමක් නිර්මාණය කලේ. ඒ අයගෙ චින්තනය රාමුවකට කොටු වෙලා තිබ්බ නම් ඔවුන් කවදාවත් අලුත් දෙයක් හොයා ගන්නෙ නෑ. ඒ හින්දා අපේ රටට දැන් ඕන කරල තියෙන්නෙත් ඒ විදියට රාමුවෙන් එපිටට හිතන්න පුළුවන් අයයි.
ඒ වගේමයි නිදහස් චින්තනය කියන එකට විෂය ක්ෂේත්‍රයක් නෑ. විද්‍යාව, කලා, වාණිජ කියල වෙන්වෙන් නෑ. මොකද එහෙම විෂය ක්ෂේත්‍රය විධියට වෙන් කලොත් නැවතත් එතන නිදහස් චින්තනයක් නැතිවෙනවා. ඒ කියන්නේ අපි මොකක් හරි දෙයක් ගැන හිතද්දී මම විද්‍යාත්මකව හිතනවා හෝ මම කලාත්මකව හිතනවා ආදී වශයෙන් අපි අපේ චින්තනයට සීමා පනවන්නේ නැතිව නිදහස්ව සිතිය යුතු බවයි. එමගින් පූර්ණ විද්‍යාත්මකත් නොවන, පූර්ණ කලාත්මකත් නොවන නමුත් ඒ සියලු ගති ලක්ෂණ ඇති වඩා පරිපූර්ණ, වඩා සාර්ථක නිර්මාණ කිරීමට හැකිවේ.
මම හිතන්නෙ අපේ රට ගොඩගන්න නම් රාජ්‍ය මට්ටමින් නිදහස් චින්තකයන් ප්‍රවර්ධනය කරන්න ඕනෙ කියලයි. (හැබැයි මෙතුවක් කාලෙකට අපේ රටේ ප්‍රවර්ධනය වුනේ ව්‍යාපාරිකයන් විතරයි.) හැබැයි මේක කියනවට වඩා අමාරුයි. මොකද ඔය බුද්ධිමත්තු කියල පෙනී හිටින ගොඩ දෙනෙක් බුද්ධිමත්තු නෙවෙයි. උගත්තු විතරයි. (උගත්කමයි, බුද්ධිමත්කමයි කියන්නෙ එකක් නොව දෙකකි.(මෙය කියවන්න - දැනුමයි - බුද්ධියයි) උගතෙක් යනු දැනුමෙන් (knowledge) පිරිපුන් පුද්ගලයෙක් වන අතර බුද්ධිමතෙක් යනු බුද්ධියෙන් (intelligence) පිරිපුන් පුද්ගලයෙක් වේ.) ඒ වගේම නිදහස් චින්තකයෙක් වෙන්න අවශ්‍ය බුද්ධිය මිස උගත්කම නෙවෙයි. බස් රියදුරෙකුත් බුද්ධිමතෙක් වෙන්න පුළුවන් උගත් නැතුවට, ඒ වගේම මහා ඇදුරු කෙනෙකුත් උගතෙක් විතරක් වෙන්න පුළුවන් බුද්ධියෙන් අඩු. (මෙහෙම කිව්වට කව්රුත් වරදවා වටහා ගන්න එපා.) හැබැයි බුද්ධියට අමතරව උගත්කමත් තියෙනව නම් ඒක ලොකු හයියක්.

"අපේ" නොවන "මගේ" පැවැත්ම

Monday, May 18, 2009
"මම" අයත් නොවන "අපි" ඉන්නවද? "මගේ"ත් නොවන "අපේ" දේ තියෙනවද? මම! මම! මම! ඇයි මම? හෝව්! හෝව්! මේ ප්‍රශ්නෙ නම් අහන්න එපා! අපි හැමෝම වගේ මේ ප්‍රශ්නෙන් නවතිනවා. එහෙම නැත්නම් මගඅරිනවා.
මට වැදගත් මගේ පැවැත්ම හා එයම විතරයි. මට වෙන කිසිම දෙයක් වැදගත් නෑ. මම, මගේ පවුල, මගේ ගම/නගරය, මගේ රට, මගේ ලෝකය, මගේ විශ්වය. සාමාන්‍යයෙන් කියනකොට මේකෙ "මගේ" වෙනුවට "අපේ" කියල දාගන්නෙ ලස්සනට!
මම ලියපු අමුතු සතා - (ඔබත් මමත් කොටස්කාරයන් වන අමුතුම අමුතු සතා) හා පරිණාමයේ හා ජීවියාගේ අරමුණ ගැන පිස්සු කතාවක්! ලිපි කියෙව්වා නම් අපේ මූලිකයේ(සෛලයේ) ඉඳලා මගේ යන සංකල්පය ක්‍රියාත්මක වෙන විධිය තේරෙන්න ඇති. මගේ දැක්මට අනුව නම් උසස් යැයි කියන බහු සෛලික ජීවීන් යනු ආත්මාර්ථයේ ප්‍රතිමූර්ති. තනි සෛලයකට තනිව පැවතීමට නොහැකි වූ කල සෛල එකතුවකින් සමාජයක් හදා ගන්නවා. සෛල සමාජයෙන් වෙන් කරලා තනි සෛලයකට වෙනමම ඊට ජීවත් වෙන්න අවශ්‍ය සියළු සාධක දෙන්නේ නම් ජීවත් වෙනවා. මට නම් අනිත් අය නැතුව ඉන්න බෑ කියන්නෙ නෑ! පොඩ්ඩක් ඉන්න. දැන් ඔබ කියයි මට නම් එහෙම බෑ කියල. මේකට හේතුව පැහැදිලියි. අවුරුදු මිලියන ගාණක් තිස්සෙ සමාජයත් එක්ක ඉඳල ජානගත දේ වෙනස් කරන්න ගොඩක් අමාරුයි. (ජාන කියන්නෙ නියම ජාතියක්! නියමෙට අපිව කඩේ යවන්න දන්නවා! හැබැයි ඉතිං ජාන නැතුවත් බෑ! බෑ! බෑමයි!) සමාජයෙන් මට ලැබෙන ආතල් එකම සමාජයෙන් තොරව මට කොහොම හරි ලැබෙනවනම් ඉන්නවනේ! ධනවාදය, ලිබරල්වාදය කියන්නෙ මේ ආත්මාර්ථය එලිපිටම කිසිම නීති-රීතියකින් තොරව දරුණු විධියට ඉටුකරගැනීමක්. සමාජවාදය කියන්නෙ මේ ආත්මාර්ථය ලස්සන කොලේකින් වහල යම් සීමාවන් අනුව සුමටව කිරීමක්!
මෙතෙන්ට මම The Matrix - වෙනස් විධියකට දකිමු; කියවමු. ලිපියෙ ලියපු කතාවකුත් තිබ්බනම් හොඳයි කියල හිතුනා.
"තමන්ගෙ පැවැත්ම (මෙතැනට සුදුසුම වචනය තමයි තමන්ගේ පැවැත්ම යන්න; නැතුව අපේ පැවැත්ම යන්න නොවේ) තමයි හැමෝටම වැදගත්ම දේ. (ලිංගිකත්වය උනත් නිර්මාණය වී තියෙන්නෙ තමන්ගෙ පැවැත්ම සඳහායි. උදාහරණයකින් කියනවා නම් මිනිහෙක් ලිංගික ක්‍රියාකාරකම් වල යෙදෙන්නේ තමන්ගේ පරම්පරාව ඉදිරියට ගෙන යන්න මිසක් එහා ගෙදර එකාගෙ පරම්පරාව ඉදිරියට ගෙන යන්න නෙවෙයිනේ. (ඒකයි මෙතෙන්ට ගැලපෙන්නේ අපි නොව මම කියල කිව්වෙ.) ඔය සමහරු කියනවා වගේ මිනිස්සු හැම දෙයක්ම කරන්නේ ලිංගිකත්වයට නෙවෙයි තමන්ගේ පැවැත්මට. ලිංගිකත්වය යන්න මගේ ලේ, මගේ ජාන ඉදිරියට ගෙන යාමක්. මගේ පැවැත්ම කියන්නේ ඒකයි. මූලික අවශ්‍යතාවය ඒකයි. තමන්ගේ පැවැත්ම! පංචස්කන්ධය පිනවීම වැනි බාහිර ක්‍රියාකාරකම් වලින් වැසී තිබුනත් ඕනෑම කෙනෙකුගේ චිත්ත ප්‍රවාහයේ ගැඹුරින්ම පවතින්නේ තමන්ගේ පැවැත්ම!! ඒ සඳහා තමයි මේ හැම දෙයක්ම කරන්නේ. - අත්තාහි අත්ත නො නාතෝ , කොහි නාතෝ පරෝසියා - තමාට පිහිට තමාමය , තමාට අන කවරෙකුගේ පිහිටක්ද? කියල බුදුරදුන් පැවසුවේ ඒ නිසයි. අනෙකා තමන්ට පිහිට වන්නේ (එමෙන්ම තමන් අනෙකාට පිහිට වන්නේද) ඔහුගේ පැවත්මට තර්ජනයක් නොවන තාක් පමණි.) අපි උනත් මේ film එක බලල මෙච්චර කියවන්නේ මේකෙදි මිනිස්සුන්ගෙ පැවැත්මට තර්ජනයක් වෙන හින්දනෙ. පොඩ්ඩක් හිතල බලන්න මේකෙ මිනිස්සු වෙනුවට කූඹින්ව හරි මාළුන්ව හරි බලශක්ති ප්‍රභව විධියට යන්ත්‍ර විසින් පාවිච්චි කරල තිබ්බ නම් අපිට මෙච්චර ප්‍රශ්න නෑනෙ. දැන් මේ යන්ත්‍ර වලට බුද්ධිය තියෙනවා. ඒ කියන්නේ පණ තියෙනවා. පණ තියෙන ඕනෑම කෙනෙක් තමන්ගේ පැවැත්ම තර්ජනයට ලක් වන විට ඉතාමත් දරුණු වීම ස්වභාවිකයි. (ආත්මාරක්ෂාව සඳහා ක්‍රියා කරන්න නීතියෙනුත් අවසර තියෙනවනේ!!!) මේ කතාවෙ තුන්වෙනි කොටසෙදි එක් නගර සභිකයෙක් Neo ව Zion නගරය ක්‍රියාත්මක වන කොටසට රැගෙන යනවා. එහිදී නගරය ක්‍රියාත්මක කරවන්නේ/ ජීවත් කරවන්නේ යන්ත්‍ර වල (මේ යන්ත්‍ර බුද්ධිමත් යන්ත්‍ර නොවේ.) උදව්වෙන් බව පෙන්වනවා. ඇත්තටම කියනවා නම් අපිට අවශ්‍ය ඒකනේ. අපිට ඕනෙ අපි නොවන පිරිසක් මෝඩයෝ වගේ අපිට ඕන දේවල් කර කර ඉන්නවා දකින්නනේ. ඒ අය එය ප්‍රතික්ෂේප කර ඔවුන්ගේ නිදහස වෙනුවෙන් අපට විරුද්ධව සටන් කලොත් ඔවුන් නරක යැයි අපි හංවඩු ගසමු. (මෙතෙන්දි සමහරු කියන්න පුළුවන් අපි ඔවුන්ව නිර්මාණය කල නිසා ඔවුන්ව අපට අයිතියි කියා. නමුත් ඒ කතාව හරියට ළමයෙක්ව උපද්දපු පලියට අම්මටයි තාත්තටයි ළමයව මරන්නත් අයිතිය තියෙනවා වගේ කතාවක්නෙ.) අපගේ පැවැත්මට තර්ජනයක් නොවන තාක් කල් සියල්ල හොඳය. එරෙහි වුවහොත් ඔවුන්ව විනාශ කල යුතුය. අනික හිතන්න යම් දවසක මිනිසුන්ගේ සියළුම බලශක්ති ප්‍රභව නැති වී මිනිසුන් වඳවීමේ තර්ජනයට මුහුන පෑවා කියල. එතකොට මිනිස්සු හොයාගන්නවා මාළුන්ගෙන් මේ විධියට බලශක්තිය නිපදවන්න පුලුවන් කියල. එදාට මේ යන්ත්‍ර මිනිස්සුන්ට කරන දේට විරුද්ධ වුන කීදෙනෙක් මේ මාළුන් වෙනුවෙන් නැගී සිටීවිද? අනෙකකු නොව ඔබ නැගී සිටිනවාද? අනෙකාට ඇඟිල්ල දික් නොකොට තමන් තුලින් යථාර්තය දකින්න. මේ ලෝකය වඩා ලස්සන තැනක් කරන්න එතකොට හැකිවේවි."
මම මගේ වහලෙක්! මම මට ඕන දේවල් මට ඕන විධියට කර කර ඉන්නවා, මගෙන් මට නිදහසක් නෑ! අනිත් එක මම කියන්නෙ කව්ද? මම කියන්නෙ මගේ දැනුම! මගේ නියම නිදහස තියෙන්නෙ මම නම් වූ වහල් ස්වාමියාගේ (එනම් මගේ දැනුම) රාමුවෙන් එපිට! මමත්වය නැති කිරීම නියම නිදහස වෙන්නෙ අන්න එහෙමයි!
සම්බන්ධිත ලිපි:
The system

නම:Marx, ලක්ෂණ:

Sunday, May 17, 2009
පහත ලක්ෂණ ඔබටත් තිබෙනවාදැයි බලන්න.

1. මාක්ස් යනු ලොව පහළ වූ ශ්‍රේෂ්ඨතම බුද්ධිමතා යැයි විශ්වාස කිරීම. (සමහරුන්ට නම් එය මාක්ස්ව අදහන තරමටම ප්‍රබලයි.)
2. බටහිර විද්‍යාව යනු පරම දැනුම පද්ධතියක් යැයි විශ්වාස කිරීම. (දැනට බටහිර විද්‍යාවේ යම් යම් අඩුපාඩු තිබුනත් ඉදිරි කාලයකදී ඒවා සියල්ල විස‍ඳේ යැයි විශ්වාස කරයි. - බටහිර විද්‍යාවට ඇත්තේ නියම පදනමක් කියල හිතං ඉන්නවා.)
3. උග්‍ර භෞතිකවාදීන් වීම. (මනස යනු මොළයේ ක්‍රියාකාරීත්වයෙන් හටගන්නක් බව මාක්ස් කිව්ව හින්දද දන්නෑ!)
4. සමාජවාදය යනු සමාජය සඳහා පරම (ideal) ක්‍රමය ලෙස විශ්වාස කිරීම. (සමාජවාදයට වඩා හොඳ ක්‍රමයක් කොහොමටවත් නැති බව සිතා සිටියි. - අනාගතයේදී වත් ඇති නොවෙයි කියලත් හිතනවද දන්නෑ!)
5. තමා සාමාන්‍ය සමාජයට වඩා අඩියක්වත් ඉදිරියෙන් ඉන්න බව සිතා සිටියි.
6. සාමාන්‍ය සමාජය දෙස අනුකම්පාසහගත ලෙස බැලීම.
7. බොහෝ දේවල්, (විටෙක සියල්ල) දේශපාලන හා ආර්ථික ක්‍රියාවලි වල ප්‍රතිඵල ලෙස සිතා සිටියි.
8. ඉන්ද්‍රිය සංවේදනයෙන් ලැබෙන දැනුම යනු පරම සත්‍යය යැයි සිතා සිටියි.
9. මොවුන්ට ආගම් යනු ගොන්පාට්ය. ආගමකට සුලු හෝ ගෞරවයක් දක්වන්නේ නම් ඒ සමාජයෙන් ඇති බලපෑම නිසා මිස එම ආගමේ කරුණු පිළිබඳ පැහැදීමකින් නොවේ.
10.ඉතා දැඩි ලෙස ඉහත දේවල් විශ්වාස කිරීම. (මේවා හරියට නිරපේක්ෂ සත්‍යය ලෙසට විශ්වාස කරයි. - මේ අදහස් කිසිවිටෙකත් කිසිම හේතුවක් නිසා වත් වෙනස් නොකරයි.)

මේ ලක්ෂණ ඔබටත් තිබේනම් ඔබේ නමත් මාක්ස් විය හැක! (මීට අමතරව තවත් ලක්ෂණ ඔබ දන්නේ නම් කරුණාකර සටහන් කරන්න.)

The system

Sunday, May 10, 2009
The system is all around you. It is also within you. And the system is almost perfect. It has no malfunctions. It has no exceptions. Everyone and everything is important to the system. No one is left behind or ignored by it. And it also waits for no one. The system is more powerful than you could ever imagine. So powerful that no one could ever escape its power. So powerful that even the system itself can’t escape from it.
The system feeds you. The system makes you live. The system gives you happiness. The system gives you means to live. And it also gives you dreams and hopes to live with. It gives you love. It also makes you love it. The system will give you power, so much power that will rule everyone, but only if you are not dare to go against it.
But at the same time the system makes you starve. And it will eventually kill you. The system gives you sorrow. And it makes you suffer. It will also shatter your dreams and hopes. It gives you hate. And it also makes you hate it.
The system is the universe. The system is the world. The system is me. And more importantly the system is you!
See it; feel it; know it from within you. Maybe sometimes you will stand a small chance to escape from it to a state with no sorrow and no happiness; no life and no death; to a state of pure stillness and true freedom.
But…
The important question is, do you want to escape? Or will you live by it under its command? The choice is yours and yours only. But remember, the system will not wait for you!

බුදුදහම විකෘති කරන්න එපා!

Thursday, May 7, 2009
මෙය ලියන්න මා පෙළඹුනේ දැනට දින කීපයකට පෙර මා දුටු ලිපියක් නිසයි. (මේ ලිපිය සින්ඩියේත් තිබුණු නිසා බොහෝ දෙනා දකින්නත් ඇති.) එහි තිබුනේ වෙනත් රටක මෑත අතීතයේ සිටි රහතන් වහන්සේ නමකට ඊට පෙර සිට පිරිණිවන් පෑ ඇති බුදුවරුන් පැමිණ ආශිර්වාද කලා යැයි කියැවෙන කතාවකි.
මෙය බරපතල කතාවකි. මේ අභියෝග කරන්නේ බුදුදහමේ හරයටයි. මෙයින් බුදුදහමේ එන ලෝකය සම්බන්ධ මූලිකම ඉගැන්වීම් 3න් 2ක් ම අභියෝගයට ලක් කරයි. බුදුදහමේ එන පරිදි ලෝකය,
1.අනිත්‍යය
2. දුක්ඛය
3. අනාත්මය
නමුත් මෙම කතාව මඟින් මෙහි අනිත්‍ය හා අනාත්ම යන කරුණු හෑල්ලුවට ලක් කරයි. බුදුදහම අනෙක් දේව ආගම් වලින් වෙනස් වන්නේ මේ ඉගැන්වීම් නිසාය. නමුත් මේ කරුණු ඉවත් කල විට බුදුදහම අනෙක් දේව ආගම් මට්ටමට වැටේ.
මා මෙය දකින්නේ බුදුදහමට එරෙහිව කරන කුමන්ත්‍රණයක් ලෙසිනි. මෙවැනි කුමන්ත්‍රණ අද කොතෙකුත් ඇත. බොහෝ අය කැසකවන්නේ ලොව ඇති අනෙක් ආගම් වලින් පැහැදිලි ලෙස වෙනස් වූ බුදුදහම විනාශ කර දැමීමටය. මෙය අධිපතිවාදයේ ප්‍රතිඵලයකි. අනෙක් සියළුම ආගම් යම් අධිපතිවාදයකට (දෙවියන්ගේ හා දේව නියෝජිතයන්ගේ අධිපතිත්වයට) ඉඩ සලසන අතර එසේ නොවන එකකට ඇත්තේ බුදුදහමය. බුදුදහම ඉතාමත් පැහැදිලි ලෙසම සියළුම දෙනාගේ (මිනිසාගේ පමණක් නොව සියළුම සත්වයන්ගේ) නිදහස අගය කරයි. එනිසා සමහර ජාතීන්ට තම අධිපතිවාදය ලොව පැතිරවීමේදී බුදුදහමේ මේ එන නිදහස් ප්‍රතිපත්ති බාධාවක් බව නොකිවමනාය. එනිසා මේ බාධකය බිඳහෙලන්නට ඔවුන්ට අවශ්‍ය වී ඇති බව ඔවුන් කරන කියන දේ වලින් පැහැදිලිය. හනිංටන් මහතාගේ “clash of civilizations” පොතේ පවා අන් සියළු ආගම් තිබියදී ථෙරවාදී බෞද්ධ සංස්කෘතිය/ශිෂ්ටාචාරය පමණක් “ගොන්පාට්” කර දක්වන්නේත් මෙනිසා විය හැක.
ගෞතම බුදුරදුන්ගේ ධර්මය පවතිනවා යැයි කියා ඇති වසර පන්දහසෙන් අර්ධයකට වඩා (එනම් 2500 කට වඩා) දැන් ගෙවී අවසන්ය. එනිසා දැන් ඇත්තේ අසීරු කාලයකි. බුදුදහම විනාශ කරන්නට ඇති බලවේග වඩා දැඩි ලෙස පෙරට එමින් පවතී. මේ සඳහා හොඳම ක්‍රමය “පිටත සිට පහර දීම” නොව “ඇතුලත සිට පහරදීම” බැව් ඔවුන් තේරුම් ගෙන ඇත. බෞද්ධයකු නොවන අයෙකු බුදුදහමට පහර ගසා විනාශ කරනවාට වඩා හොඳින් බෞද්ධයකුටම බුදුදහමට පහර ගසා විනාශ කල හැක. ඊටත් වඩා හොඳින් ස්වාමීන් වහන්සේ නමකට කල හැක. (අද සමහර භික්ෂූන්ගේ ක්‍රියාවන් සිහියට නගා ගන්න.) ඊටත් වඩා හොඳින් මාර්ගඵල ලාභියෙකුට කල හැක. (තමන් සෝවාන් ආදී ඵලයන්ට පත්වී ඇතැයි කෑගසන අය දැන් බිහිවී ඇත.) ඊටත් වඩා හොඳින් රහතන් වහන්සේ නමකට (එලෙස කියා ගන්නා අයට) කල හැක. (මේ සිදුකර ඇත්තේ එයයි.)
එනිසා සියලු බෞද්ධයින්ගෙන් හා ඉල්ලීමට ඇත්තේ මොවුන්ගෙන් පරිස්සම් වන ලෙසයි.
එමෙන්ම තමන් පවසන දෙයිනුත් බුදුදහම ආරක්ෂා වන්නේද නැතිනම් පහර වදින්නේද යන්න ගැනත් සිතා බලන්න. මෙය මා පවසන්නේ මෙනිසාය; අප බුදුදහම ගැන කතා කරන්නේ අපට තේරෙන ආකාරයටය. අපි නම් පිළිගන්නවා අපි තාම මාර්ගඵල ලබල නෑ කියල. එනිසා අපි, අපිට තේරෙන විධියට කතා කලත් ඒ දේවල් වැරදි වෙන්න පුළුවන්. එනිසා බුදුදහමේ එන කරුණු වලට අර්ථදැක්වීම් දෙන්නට යන විට පරිස්සම් වන්න.
හැම දෙනාටම බුදුසරණයි!

ඉතා වැදගත්!!
මේ කරුණු සියල්ලම මා පවසන්නේ මාගේ දැනුමට අනුව මා හට වැටහෙන ආකාරයටය. මාගේ මතය යනු නිර්මල බුදුදහම නොවීමටද හැකිය. මා පවසන දෙයින් බුදුදහමට යම් හානියක් වන්නේ නම් කරුණාකර එය පෙන්වා දෙන්න. එනිසා විවෘත මනසකින් යුතුව නැණසින් මෙය කියවන්න.
Related Posts with Thumbnails